ياطول الليل وياثقله وعيني ماتذوق النوم
أنا ونجومه كم بتنا نشاكي الهم وأحواله
أقلب في سباتي دفتري وتغص فيني هموم
مواجيعـ( ن) تهز قلبي وقلبي شايل أحماله
يآقلبي ياكثرٍ طعوٍنكـ بخنجرٍ داميـ( ن) مسموٍم
وطاعن قلبي صافيته ورمش عيوني ظلاله
يون القلب ونين أمـ( ن) فجيعه بطفلها المفطوم
يموت الطفل في مهده بليلن مرخي أسداله
صحيح الدنيا غدارة ومليانه حقارة وشوم
تهلي يوم للرجال وعشر أيام تغتاله
تضيق نفسي إذا شفت الكريم بعزته مذموم
ورِديّ النفس يتباها وينشر أردى أفعاله
وإذا شفت الشجاع اللي حسامه للعدا معلوم
طعنه اللي وثق منه في ظهره بليل وإغتاله
زمان الذل كم جمع جموع نذاله ورخوم
زمان أغبر وأنا نفسي تعيف الداني وأشكاله
إذا الغربان شغلتها على الفضلة تجي وتحوم
فنا طيري على رجمـ( ن) تعلا شاهق جباله
أنا ذيب ما عيش إلا وحيد أو فوسط قروم
وأعَشْق الموت إذا حسيت بذلـ( ن) أو غديت عاله
عزيز النفس في عين الرجال ولي قدر محشوم
وأكرم لحيتي عن ردة الحسّاد لحثاله
أنا يمناي مركازي وأنا فزاع للمحروم
لجل شكواه ركبت الموت وبحر المر وأهواله
وإذا عيت يميني وأقصرت في لهفة المظلوم
قطعت إيديني الثنتين لخذلانه وإهماله
وإذا أقبل علي إنسان أنا أفرش له الثرى مشموم
ملكني يوم رحب بي وقلطني لفنجاله
وإذا حسيت منه الغدر جعلته عبرة للقوم
وإذا ماكان غادر بي أنا والله لصفاله
عدوي ماهنى جفنه ولا ذاقت عيونه حلوم
أنا لاشافته عيني تكفن يرثي أحواله
طلبت من ربي العزة ولو في حنظل مسموم
وأعوذه من شراب الذل ولو الشهد حثّاله
يعلها تصدق أقوالي وفي الشدة أنال وسوم
ولاخير( ن) من لا يتبع أقواله بأفعاله
وبعل العاذل الشمّات على ضعفي أبد ما يروم
ويعلني مهتني بقبري قبل ما يوصل آماله
ويعلني بالبياض اللي يخلي شاربي مدسوم
ويعلني في رضى ربي أعيش أيامي وأسعى له
لربي خاضع وجهي وشامخ في وجيه خصوم
وأنا ساجد يهل دمعي بذل وجل إجلاله
الثلاثاء ديسمبر 29, 2009 5:28 pm
